Абай облысында әкесі 5 жасар қызына миллиондап қарыз болып қалды

Абай облысында әкесі туған қызына алимент төлемей, 2 млн теңгеден астам қарыз болып қалған, деп хабарлайды Arbat.media.

Polisia.kz сайтының мәліметінше, 36 жастағы Аягөз қаласының тұрғыны өзінің 5 жасар қызына 2 млн теңгеден астам қарызданған. Ол кәмелетке толмаған баласының құқығын бұзғаны үшін бас бостандығынан шектеу жазасына кесіліп, жазаның бүкіл мерзімі бойы бір жүз сағатқа мәжбүрлі еңбекке тартылды.

“Жазаны өтеу үшін ол Аягөз аудандық пробация қызметінің есебіне қойылып, қаладағы кәсіпкерлердің бірінде жұмыс істейді. Қазіргі уақытта ол тапқан табысының бір бөлігін берешегін өтеуге жұмсап жатыр, ал берешектің бір бөлігі өтелген”, - дейді Аягөз аудандық пробация қызметінің бастығы Ислам Дюсембеков.

Сотталған ер адам өзінің жасаған әрекетіне өкінетінін айтып, әйелі екеуі ажырасқанда қызы 3 жаста болғанын айтты.