Азық-түлікті негізсіз қымбаттатқандарға енді бірден айыппұл салынатын болды

Қазақстанда азық-түлікті негізсіз қымбаттатқандарға енді бірден айыппұл салынатын болды, деп хабарлайды Arbat.media.

Бұл туралы сауда министрлігі хабарлады. 13 наурыздан бастап әлеуметтік маңызы бар тауарларға шектен тыс үстемақы қосқандарға бірден айыппұл салынады.

Әлеуметтік маңызы бар тауарлардың қымбаттағаны ең әуелі әлеуметтік осал топтардың күнкөрісін қиындатты.

Қымбатшылыққа бүгінде аз қамтылғандардың ғана емес, орташа жалақы алып отырған азаматтардан да шағым көп. Тек биылдың өзінде ғана азық-түлік бағасын көтеріп, үстемені арттырғаны үшін 1189 әкімшілік іс қозғалып, кәсіпкерлерге 5 млн 845 мың теңге айыппұл салынған. Себебі олар сауда заңнамасы мен тұтынушылар құқығын сақтамаған. Жауапкершілікке тартылғандар көрсеткіші бойынша Қарағанды облысы, Алматы мен Астана қалалары көш бастап тұр.

“Бұдан былай айыппұл бірден салынады. Заңға өзгерту енгізілді. Сондай-ақ сауда департаменттерінің жұмысы делдалдық схемаларды анықтауға бағытталады. Биыл Алматының өзінде сауда заңнамасын бұзу, сатушы мен өндірушілер арасында пайда көрудің 226 дерегі анықталып, тоқтау қойылды”, – дейді Алматы қаласы сауда және тұтынушылар құқықтарын қорғау департаменті басшысының орынбасары Нұрлан Әбдиев.

Ал саудагерлердің айтуынша, бағаның өсуіне сатушы ғана себепкер емес. Себебі өнім өндірушілерден тікелей жетпейді.