Бір тәулікте 11 жылқыны пойыз басып кетті

Жетісу облысында жүк пойызы 8 жылқыны қағып кетті.  Осы жылдың 8 айында көліктегі полиция департаментінде пойыздардың шұғыл тежелуінің 1 417 дерегі тіркелді. Еліміздің темір жолдарында 1070 жануарды қағып кету фактісі болды, оның ішінде 355 бас жылқы, 191 бас ірі қара, 28 ұсақ мал бар. Көліктегі полиция департаментінің бастығы Бақытжан Малыбаевтың айтуынша, осы жылғы 31 тамызда Жетісу облысының Быжы — Бахша аралығында жүк пойызының машинисі темір жолдан жылқы малын көріп, тежегішті шұғыл тежеді. Алайда қақтығыстың алдын алу мүмкін болмады, салдарынан 8 бас жылқы пойыз астына түсті. Жоспарланбаған пойыз тоқтауы 14 минутты құрады, - деп хабарлайды Arbat.media.

Дәл сол күні Сарыөзек — Үштөбе аралығында да осындай жағдай қайталанды, онда жүк пойызы 3 бас жылқыны қағып кетті, деп хабарлайды Polisia.kz.

Тексеру барысында Үштөбе станциясындағы желілік полиция бөлімінің қызметкерлері үй жануарларының иелерін тауып, оларды теміржолдың бөлінген жолағында мал жаю ережелерін бұзғаны үшін әкімшілік жауапкершілікке тартты.

Олар Жетісу облысының 44 және 55 жастағы тұрғындары болып шықты.

Б. Малыбаев көлік полицейлері үнемі рейдтер жүргізіп, мал иелерімен әңгімелер өткізіп, жадынамалар таратып, ауылшаруашылық жануарларының иелерін мұқият болуға шақыратынын айтты.

Ұдайы жүргізілетін профилактикалық жұмыстарға қарамастан, тұрғындар тарапынан құқық бұзушылықтарға әлі де жол берілуде.

— Теміржол арқылы өту тек өткелдерде, жол өтпелерінде және арнайы белгіленген орындарда ғана рұқсат етілгенін тағы да еске саламыз. Дегенмен қараңғы, тұманды, нөсер жаңбыр және боранды күндері, тіпті ол жерлерден де өтуге тыйым салынады, — дейді Б. Малыбаев.