Демографиялық саясаттың жаңа тұжырымдамасын әзірлеу ұсынылды

Қазақстанның 2050 жылға дейінгі демографиялық саясатының тұжырымдамасын әзірлеу ұсынылды. Ұсынысты Сенат депутаты, Қазақстан Республикасы Парламенті Сенатының Әлеуметтік-мәдени даму және ғылым комитетінің мүшесі Әсем Рахметова жасады, - деп хабарлайды Arbat.media.

Бұл туралы Kazinform агенттігі жазады. 

«Демографияға тікелей әсері бар тағы бір фактор – ұлт саулығы. Тәуелсіздіктің алғашқы жалдарында халықтың өлім-жітімі мен өмір сүру ұзақтығында айтарлықтар өзгерістер болды. Орталық Азияның басқа елдерімен салыстырғанда Қазақстанда өлім-жітім деңгейінің жоғары көрсеткіштері байқалады», - деді Әсем Рахметова.

Халық қалаулысы еліміздегі өлім-жітімнің басты себептерін атады. Оның ішінде қан айналым жүйесі ауруларынан (22,7%), қатерлі ісіктен (8,4%), жол апатынан (24,3%) және тыныс алу органдары дертінен (9,8%).

«Азаматтардың репродуктивті денсаулығы мен психо-эмоцияналдық жай-күйі тағы бар. Осы орайда құзырлы органдар салауатты өмір салтын сақтауға жалпы халықты ынталандарудың кешенді шараларын күшейткені жөн», - дейді ол.

Әсем Рахметова сөзін қорытындылай келе, Үкімет пен құзырлы мемлекеттік органдардың назарына келесі шараларды қабылдауды ұсынды:

1. Демографиялық саясатты іске асыруға, оны мемлекеттік жоспарлау жүйесіне енгізуге жауапты мемлекеттік органды айқындау;

2. Қазақстанның 2050 жылға дейінгі демографиялық саясатының тұжырымдамасын әзірлеу;

3. Қолданыстағы отбасылық-демографиялық, көші-қон, экономикалық саясат шеңберінде демографиялық теңгерімсіздік проблемаларын еңсеру бойынша кешенді шараларды қабылдау;

4. Демографияны дамыту бойынша өңірлік бағдарламаларды әзірлеу;5. Салауатты өмір салтын ұстану, репродуктивті денсаулықты қолдау бойынша шараларды қарастыру.