Науқастарға берілген астан құрт шықты

Степногорск көпсалалы қалалық ауруханасының науқастарына сапасы күмәнді тағам берілген. Олардың айтуынша, ауруханада антисанитария өршіп тұр, - деп хабарлайды Arbat.media.

Аурухананың жұқпалы аурулар бөліміндегі науқастар түскі астарын видеоға түсіріп алған. Видео кадрларына зер салсақ, науқастарға берілген компотта құрттар қалқып жүр, бірінші және екінші тағамдары да сапасыз көрінеді.

«Қоғамдық тамақтандыру бөлімінде жауапкершілігі жоқ аспаздар бар. Олар бізге: «қалаған жерлеріңе арызданыңдар, бізге бәрібір ештеңе болмайды», дейді. Бөлімшеде еден, терезе, раковина бір шелектегі сумен жуылады. Баспалдақта темекі қалдықтары шашылып жатады. Тазалыққа қатысты қойған сұрағыма «бұның маған қатысы жоқ» деп жауап берді. Біз балалармен бірге жүреміз, олар бізге осы баспалдақпен тамақ әкеледі. Медициналық қызметкерлер мен тәртіп сақшылары лифтпен жүреді», деп жазды видеоның авторы.

Шағым алып, сын астында қалған аурухана әкімшілігінің өкілдері тиісті тексеру жүргізілетінін хабарлады.

«Өтініш ескерілді. Тамақтану мәселесі басшылықтың бақылауына алынды, ыдыс-аяқты дайындау кезіндегі бұзушылықтар мен шетелдік қоспалардың бар-жоғы туралы толығырақ ақпарат қызметтік тексеруден кейін беріледі», деп хабарлады емдеу мекемесінің әкімшілігі.