Қылмыстық-атқару комитеті Абай облысындағы түрмеде болған оқиғаға қатысты соңғы ақпаратты бөлісті, - деп хабарлайды Arbat.media.
Бұл туралы ҚазАқпарат жариялады.
«Абай облысы бойынша қылмыстық-атқару жүйесі департаменті мен прокуратура Семейдегі №19 жаза өтеу мекемесінде болған жағдайға тексеру жүргізді. Атап айтқанда, БАҚ және әлеуметтік желілерде есімі көрсетілген түрмеде жазасын өтеп жатқан азаматтардан жауап алынды. Тексеру нәтижесінде айтылған фактілер расталмады», - деді Ішкі істер министрлігі Қылмыстық-атқару комитеті.
5 қазанда Абай облысының №19 қауіпсіздігі аралас қылмыстық-атқару жүйесі мекемесінде 2 сотталғанның арасында жанжал болып, бірі алған жарақатынан оқиға орнында қайтыс болған.
«Аталған факті бойынша Абай облысы полиция департаменті Қылмыстық кодекстің 99-бабы 1-бөлігі бойынша сотқа дейінгі тергеуді бастады. Абай облысы бойынша қылмыстық-атқару жүйесі департаменті қызметтік тергеу жүргізді. Оның қорытындысы бойынша бірқатар қызметкер қатаң тәртіптік жауапкершілікке тартылды», - дейді комитеттен.
Қылмыстық-процестік кодекстің талаптарына сәйкес өзге ақпарат жарияланбайтынын ескертті.
