Таразда Ұлттық су шаруашылығы университеті ашылады

Вице-премьер Қанат Бозымбаев Тараз өңірлік университетінің базасында Жамбыл облысындағы гидромелиоративтік-құрылыс институтын қалпына келтіру мәселесі бойынша кеңес өткізді, - деп хабарлайды Arbat.media.

Оған Ғылым және жоғары білім министрі Саясат Нұрбек, су ресурстары және ирригация, ұлттық экономика, әділет вице-министрлері, сондай-ақ Бәсекелестікті қорғау және дамыту агенттігі мен Жамбыл облысы әкімдігінің басшылығы қатысты, - деп жазады Kazinform агенттігі.

Қанат Бозымбаев жаңа университеттің тиісті материалдық-техникалық базасын құру, қаржыландыру және кадрлармен қамтамасыз ету туралы есепті тыңдады.

Вице-премьер еліміздің базалық жоғары оқу орындарының бірін қалпына келтіруді Мемлекет басшысы тапсырғанын еске салды.

Университетке ұлттық мәртебе беріледі, ол тек су ресурстары мәселелеріне маманданады.

Оқытушылар құрамына шетелдік ғалымдар да кіреді.

Еуропа, Қытай, Ресей және АҚШ университеттерімен жаңа ЖОО-мен серіктестік туралы келіссөз жүргізілуде.

Талапкерлерді тарту үшін білім гранттары көзделеді.

Вице-премьер қажетті ведомствоаралық рәсімдерді жеделдетуді тапсырды — университет қыркүйек айында өз есігін ашуы тиіс.