Түркиядағы көтеріліс қалай жалғасып жатыр?: тың мәліметтер

Түркияда президент Режеп Тайып Ердоғанның басты оппозициялық қарсыласы Стамбұл мэрі Экрем Имамоғлу ұсталғаннан кейін жаппай наразылықтар басталды, деп хабарлайды Arbat.media.

Еске салайық, 19 наурызда полиция Имамоғлудың үйіне басып кіріп, оны сыбайлас жемқорлық айыптарымен ұстап әкеткен.

Оның ұсталғаны туралы ақпарат тарасымен халық жаппай наразылық білдіре бастады. Наразылық 50-ге жуық қаланы қамтыды. Көшеге жиылған халықтың көбі студенттер болды. Митинг ұйымдастырушылар билікті оппозицияны саяси қудалады деп айыптады.

Түркияда жаппай наразылықтар салдарынан Стамбұл биржасының индексі тез төмендей бастады.

Стамбұл биржасындағы құлдырау 5 пайызға жетті. Сауда-саттық бағалы қағаздарды сатудан басталғандықтан, бұл қысымның артуына түрткі болды.

“Сағат 10:52:12 жағдай бойынша индекске тәуелді автоматты өшіру жүйесі іске қосылды. Сауда-саттық барлық қор нарығы платформаларында, акциялар мен оларға негізделген туынды құралдар сатылатын фьючерстік және опциондық нарықтарда, сондай-ақ облигациялардың репо нарығында уақытша тоқтатылды”, - деп жазылған биржа хабарламасында.

BIST100 индексі 9 318 тармақта, банктік индекс 12 622 тармақта. Бұған дейін биржа индексі 6,7 пайызға түсіп, 10 074 тармаққа дейін төмендеген болатын.