Жезқазғанда Наурызға орай сахна безендірген ер адам биіктен құлап көз жұмды

Жезқазған орталық саябағында Наурыз мерекесіне арнап сахнаны безендіріп жатқан ер адам биіктіктен құлап, көз жұмды, деп хабарлайды Arbat.media.

Zhest_kz телеграм арнасында 14 наурыз күні жеке кәсіпкер ретінде тіркелген ер адам Наурыз мейрамын тойлауға арналған сахнаны безендіру жұмыстарына тартылғаны жазылды. 55 жастағы ер адам билбордқа мерекелік плакат іліп жатқанда, үш метрден астам биіктіктен құлап кеткен.

Куәгерлер жедел-жәрдем шақырған. Зардап шеккен азамат облыстық көпсалалы ауруханаға жеткізілді.

1970 жылы туған ер адам жансақтау бөліміне жатқызылды. Алайда 18 наурызда оған жасалған операциядан кейін қайтыс болды.

“Қайтыс болу себебі – ми ісінуі және мидың ісініп, сабау құрылымдарының зақымдануы, сондай-ақ өкпе артериясының тромбоэмболиясы”, – деп хабарлады Ұлытау облысының денсаулық сақтау басқармасы.

Полиция қылмыстық іс қозғалғанын мәлімдеді.