Бакуде Түркі әлемінің ортақ әліпбиі талқыланды
Бакуде Түркі әлемінің ортақ әліпбиі жөніндегі комиссиясының екінші отырысы өтті. Жиынды Түркі академиясы Әзірбайжан Ұлттық ғылым академиясы Насими атындағы Тіл білімі институтының қолдауымен, Ататүрік атындағы мәдениет, тіл және тарих жоғары кеңесі жанындағы Түрік тілі қоғамымен бірлесіп ұйымдастырды, - деп хабарлайды Arbat.media.
Бауырлас мемлекеттердің өкілдері ортақ әліпби идеясын ілгерілету және осы бағыттағы жаңа қадамдарды талқылады, - деп жазады Kazinform агенттігі.
Комиссия отырысының ашылу салтанатында сөз сөйлеген Шаһин Мұстафаев ортақ әліпби мәселесі — түркі халықтары ынтымақтастығының маңызды бағыты екенін атап өтті.
«Түркі әлемінің бірлігін нығайту үшін әліпби бірлігіне де мән берілуі тиіс. Соңғы жылдары түркі мемлекеттері арасындағы ынтымақтастық институционалды сипатқа ие болған сайын, ортақ әліпби мәселесі күн тәртібінде жиі көтеріле бастады, - деді Мұстафаев.
Басқосуға Түрік тілі қоғамының президенті Осман Мерт, Әзербайжан Ұлттық ғылым академиясының президенті Иса Габиббейли, Ататүрік орталығының төрағасы Низами Джафаров және ТМҰ ақсақалдар кеңесінің мүшесі Гасан Гасанов, сонымен қатар Түркі мемлекеттері ұйымына мүше елдерден және бақылаушы мемлекеттерден келген комиссия мүшелері мен тіл білімі саласындағы ғылыми-зерттеу институттардың ғалымдары қатысты.
Түркі Академиясының базасында жұмыс істейтін комиссия әр тараптан лингвистикалық салаға жауапты екі мүшенің қатысуымен құрылған еді. Комиссияның алғашқы отырысы 2023 жылдың 29 мамырында Астана қаласында өтіп, бірқатар маңызды шешім қабылданған болатын.
